民主派就立法會選舉初選舉行協調會議，八方聽聞噚日新界西嘅協調會議就出現咗粒大花生，有消息話，代表現任議員梁耀忠嘅街工代表，喺會上突然爆出一句「梁耀忠有淺藍支持」，在場人士聽到眼都凸埋。八方就事件問過阿忠，佢話「係咩？我都唔知」，又話「我授權佢（代表）去聽嘢，冇叫佢發言㗎喎。」

噚日新界西嘅協調會議一共有近50人出席，墟冚程度冠絕咁多區，現任議員民主黨尹兆堅、公民黨郭家麒都親身出席，朱凱廸、梁耀忠就派代表現身，其他有意出選嘅團隊包括工黨吳敏兒嘅代表、新同盟譚凱邦、屯門區議員張可森、巫堃泰同元朗區議員林進等，至於其他列席嘅素人區議員就自稱去食花生。

有與會者話，會議共識不大，大家就最近形勢發表咗意見，包括對於「民主派35+」嘅睇法，以及未來係咪要透過否決預算案，令到政府回應五大訴求等；亦都有人擔心中央會大規模DQ參選人。

席間有人提到梁耀忠，諷刺佢無論如何都無機會當選云云，當時街工代表有回應，話明白大家對阿忠某啲做法有不滿，但就覺得佢有勝算，事關佢可以拎到淺藍陣營嘅支持。

八方今日問過梁耀忠，佢就話自己無開會，唔知咩事。至於「淺藍言論」，佢話「我授權佢（代表）去聽嘢，冇叫佢發言㗎喎。」至於佢對於「攬炒」嘅立場，佢都係話「唔好問我，我咩都唔知」，頭也不回就走咗去喇。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架
-----------------------------
App內1-Click訂閱《蘋果動新聞》
按此了解更多