儘管三浦知良拎過亞洲足球先生，亦係首個登陸意甲嘅日本人，但呢啲都係咸豐年前往事，而且其後佢到克羅地亞、澳洲等聯賽落班，成績一般。勢估唔到今時今日都成4張嘢嘅三浦，依舊深得國民愛戴，即使FC橫濱仲喺榜尾掙扎，佢本人聯賽亦未開齋，但佢喺明星賽球迷選舉，竟得票近21,000張，東岸前鋒排名壓新晉國腳卷誠一郎、我那霸和樹等人，真係薑越老越辣！
除咗三浦，磐田山葉39歲鋒將中山雅史，喺西岸前鋒亦排第3，約有13,000名支持者，僅次於當紅嘅矢野貴章同佐藤壽人；當然，呢場係明星賽唔係元老賽，名單中亦有唔少新名字，好似千葉市原新人水野晃樹、清水心跳嘅藤本淳吾等，前者暫為全聯盟票王！