才俊訪京熟口熟面 - 李八方

蘋果日報 2003/09/04 00:00


訪京活動一浪接一浪,今日輪到「香港各界青年領袖才俊團」。
領隊係伍淑清個細佬伍威全,佢原來係香港青年聯會主席,來頭不小。至於團員,除咗陳南祿面孔比較新之外,有啲好似黃英豪同廖長江,上次法律界訪京已經去過,但有得北上朝聖,又點會嫌多。
咁都唔好笑,有啲人已經上咗至少三次京,其中「雙簡」,即係簡福飴同簡松年最紅,廣東社團、法律界、鄉議局以至青年才俊團都話有份;唔知佢哋嘅意見係咪特別高明,中央要多聽幾次?
當然大家可以倒轉諗,就係雖然北京大開中門要多聽意見,但係聽嚟聽去都同一小撮自己友嘅高見,唔知算唔算「兼聽」?
(圖)政府人員協會副主席陳志光係上京稀客,但佢話遲吓會有機會再去兩次。


傳真︰2623-9278
電郵︰[email protected]