魚樂無窮:大快活高息抵食 - 唐牛

蘋果日報 2012/07/02 00:00


七一烈日當空,但依然有40萬人大汗疊細汗,走上街頭,目的就係為咗踢走個大話精,呢啲exactly就係香港人嘅核心價值。沿途所見,到處都人山人海,仲帶旺咗街道兩旁嘅便利店同茶餐廳,大家行到攰,都想搵個地方歇一歇,補充體力再上征途。
講開茶餐廳,最近兩隻快餐股都派咗全年成績表,當中又以大快活(052)表現較標青,值得望多幾眼。截至今年3月底止,大快活全年賺1.3億銀,按年計難得仲有5.4%升幅,營業額按年亦有近一成升幅,下半年盈利較上半年更多出超過兩成,喺最低工資、食材價漲、租金上升等不利因素下,盈利依然有增無減,集團管理層應記一功。講估值,大快活現價PE14倍,較一哥大家樂(341)折讓超過四成,息率更高達7厘,比大家樂高出一倍有多,認真超值。大快活上周五收報14.40元,升0.8%,候回試14元吸納,目標睇16元,跌穿13元止蝕。

唐牛