701收料站:亨泰可留意短炒

蘋果日報 2002/10/15 00:00


經紀陳居然重陽節都打電話畀小初,原來佢話亨泰消費品(197)有料到,有人成功埋到班想炒番一轉,叫小初留意吓,短炒亦無妨。
小初記得亨泰舊年12月上市以來,貨源一直維持在少數人手上,期間曾有籠裏雞頂唔順沽貨,令股價一度大散。不過,今年5至6月期間,有炒家埋過位,叫做炒咗一轉,但散唔散到貨就唔清楚。
近期成交靜英英嘅亨泰,上周尾段已經蠢蠢欲動,上周五升8.5%,收38.5仙,但成交就仍然唔大,只得55萬元,買咗貨都驚落唔到車,好難令人有信心。
不過,亨泰上個月公布全年業績,賺成3840萬元,比起舊年升咗22.1%,兼有1仙息派,都唔算失禮。既然公司交到成績,若有關人等肯合作,願意出嚟吹吓水,講啲北望神州之類嘅發展大計,隻股冇話冇得做。
至於水源方面,經紀陳就話已經到位,應該冇問題。小初就即管留意吓。
慕容小初