黃子華日前同年約二十多歲嘅新女友，手拖手夜遊蘭桂坊，可謂愛情得意，認真可喜，不過佢嘅事業就要加把勁啦！
自導自演
事關子華套《一蚊雞保鑣》同《魔戒首部曲：魔戒現身》一齊喺上個禮拜四開畫，《魔戒》有五十一間戲院上映，開畫日收咗百二萬，計埋之前優先場，累積票房總收有二百七十一萬，《一蚊雞保鑣》雖則只有十三間戲院上映，但開畫票房只得兩萬，真係差咗啲。
黃子華之前同梅艷芳主演嗰部《男歌女唱》票房都係收得好差，但諗唔到呢部重不濟。《一》片重係子華自導自演嘅戲，票房咁嚇人，相信對佢嚟講會係一個打擊。
李安開拍《臥虎藏龍》前傳
據中央社報道，《臥虎藏龍》嘅製片徐立功喺美國洛杉磯接受訪問時，話雖然李安𠵱家拍緊荷李活科幻片《變型俠醫》，但佢已經答應喺明年五月開拍《臥虎藏龍》嘅前傳。徐立功重話𠵱家已經着手搵《臥》片編劇王惠蘭執筆寫劇本，等李安可以盡早敲定參演人選。
劉家良嫌《洪拳》製作費低
劉家良同邵氏傾開戲，方逸華想劉師傅今年開《洪拳》同《醉馬騮》兩部片，不過劉師傅同邵氏製作部負責人黃家禧為咗製作費而爭拗。聽聞上個禮拜劉師傅同黃家禧傾到幾勞氣，因黃家禧希望可以一千萬拍晒部戲，但劉師傅一向要求高，當然希望有多幾百萬製作費啦！
江芷妮撇男友東瀛出血
江芷妮噚日喺馬鞍山新港城中心為活動擔任司儀，佢話酬勞都好滿意，有四位數字，而下個禮拜，佢會同幾個圈外朋友去日本九州旅行。江芷妮話成年都未放過假，而為咗可以購物大出血，佢男朋友今次唔會同行。另外。同場有份出席嘅錢小豪，就透露最近忙緊幫張之亮籌備電影《墨子攻略》。
唐季禮拉攏華仔搞製作
導演唐季禮（前排左）噚日喺上海開記者會，宣布同內地茂盛集團合資五億元開設盛唐製作公司，順便做埋新劇《壯志雄心》開鏡禮，主角任達華同沈傲君亦有出席。唐季禮透露佢間公司會同禤家珍、劉德華同埋陳果合作，開拍一套一百二十小時嘅劇集同三部電影。劉德華同陳果之前被傳不和，𠵱家又合作開戲，唔通已和好如初？
尚格雲頓CNN談吳宇森
影星尚格雲頓（JeanClaudeVanDamm）喺CNN嘅《亞洲名人聊天室》訪問，前晚馮仁昭都有睇到。主持人問佢有冇同吳宇森聯絡，佢話吳宇森𠵱家好忙，又成功，所以比較少聯絡啦。而問到佢覺唔覺得自己帶吳宇森入荷李活時，佢話：「佢喺荷李活第一部電影《終極標靶》係同我一齊合作嘅，只可以話互相幫助。」