當年今日

隔牆有耳:
陳克勤揸波子cut雙白線 - 李八方

蘋果日報 2013/12/31 00:00


建制派議員鍾意去西環係人都知,噚日有人目擊民建聯陳克勤喺西環出沒,仲涉嫌違例駕駛。一位住西環嘅司機話,噚日朝早9點45分,見到陳克勤揸住架黑色波子跑車,離開西環均益大廈停車場,停車場門口嘅德輔道西有交通標誌指示車輛向左駛,路中心又劃咗雙白線,理論上要返中環應要先左轉,然後再兜路上天橋,但係陳克勤就直切過雙白線,大U-Turn右轉往中環方向絕塵而去。咁搞法,至少要罰450蚊兼扣3分。
empty
陳克勤(左)揸住黑色波子跑車cut雙白線(中)再大U-Turn(右),向中環方向絕塵而去。讀者提供圖片
均益大廈咁近中聯辦,唔通今次陳克勤又趕住去溝通交流?陳克勤回覆話佢父母住喺均益大廈,朝早係去做孝順仔探父母,但佢就話完全冇留意條路上有雙白線同交通標誌,唔知有違例,仲話自己去過均益好多次,每次都係都咁走。佢聲稱好多謝市民提醒,下次會小心啲。根據經驗,建制派幾乎去完西環就會U-Turn轉軚,睇嚟陳克勤都係黨性難移啫。
empty
陳克勤
有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange