名氣呢家嘢的確唔係話有就有，最起碼條件就係要有大把時間，日日出席各種唔同場合，好似賭王何鴻燊就係嘞，佢見報率之高肯定講出嚟都得人驚，港聞、財經、地產、社交娛樂瓣瓣齊。呢，前晚賭王又得獎，香港社交雜誌《HongKongTatler》二十五周年，頒咗個「25YearsattheTop」最高殊榮大獎畀佢，表揚賭王喺二十五年來（實際當然唔止呢個數）喺事業同社交界一樣高踞要位、舉足輕重咁話。

爭女傳聞嚇走四太
賭王得獎自然鬼咁開心，重公開佢嘅秘訣只有兩個字，就係「勤力」。
賭王同八方講得興起之際，忽然有記者提到早排有雜誌話賭王姪仔何猷強自爆同賭王爭女仔，歌手溫柳甜差啲做咗三太呢單嘢。點知一講到「溫柳甜」三個字，賭王身邊嘅四姨太隨即嗱嗱聲一手拉住賭王，一面話：「呢邊，我哋趕十一點飛機走，快啲啦！」三扒兩撥就拉咗賭王上車，八方同埋班行家只能講一句：四姨太，你係得嘅！
﹙圖﹚聽到「溫柳甜」三個字，四姨太拖住賭王急急腳走人。


傳真︰2623-9278
電郵︰[email protected]