歐國盃決賽花絮

蘋果日報 2012/07/02 00:00


比堅尼辣妹扮卡斯拿斯
西班牙周日贏意大利賽前,匈牙利某電視台就率先搵咗10個分別着住代表兩隊比堅尼嘅辣妹(上圖),進行一次12碼對決。呢班靚女個個有樣有身材之餘,熱身都唔馬虎,一字馬、拱橋乜都有;而踢起波上嚟都有板有眼㗎,當中代表狂牛嘅門將仲好似卡斯拿斯上身咁,連撲對手4球,終帶領球隊以3:1勝出;講多冇謂,睇片啦。 http://www.metro.co.uk/sport/oddballs/903835-hungarian-tv-recreates-spain-v-italy-with-bikini-models#ixzz1zRPri3OZ
草泥馬決賽撻Q
草泥馬臨尾香!嚟自天津動物園嘅神獸、俗稱草泥馬嘅羊駝大胖,雖然今屆估歐國盃賽果11場10中,人氣度力逼兩年前「師兄」八爪魚保羅;但偏偏去到決賽,大胖竟然嚟個反高潮,估錯咗意大利封王,俾貼西班牙成功衞冕嘅「烏鴉口」球王比利威番鑊。其實大胖估12場中10場,命中率都有83%,所以唔少網民都希望佢休息兩年後,喺巴西世界盃繼續發功。
牛迷潛行頒獎台
西班牙歷史性衞冕歐國盃,捧盃一刻全隊職球員high爆就不在話下,但唔知現場啲保安係咪都興奮得滯,竟然可以畀個着咗件狂牛外套嘅球迷(紅圈)魚目混珠,成功去到頒獎台,攬住隊長卡斯拿斯慶祝,又同球員影相;直至沙比阿朗素同教練迪保斯基發現咗,班保安先識拉走個球迷。好在個球迷冇搞事啫,如果唔係後果都不堪設想。
empty
詹sir寸盡伊巴
一向鍾意喺棟篤笑扮鬼扮馬嘅詹瑞文(右),前晚喺黃埔嘉禾戲院做人生第一個足球棟篤笑,45分鐘內只得萬國旗制服一套,但內容依然抵死。佢由「國貨」草泥馬到瑞典名將伊巴謙莫域揶揄一番,一句「國貨通常係假嘢」,結果真係講中草泥馬預測意軍封王「撻Q」;又話伊巴臨尾先發威,真名其實係「家先落力」。仲不忘話驚自己太紅,下次會有人搵佢頂克勤唱主題曲,認真頂癮。
empty