農曆年假期行旺角，條街小販多過舊年。功夫L卻叫苦連天，話小販生意旺丁又旺財，更唔使交租，早知係咁佢豁出去做番小販好過。
功夫L苦守月餅場賣潮流精品已半年，本來做翻版小販起家，後尾聽高官呼籲增值自己，更響應祖國加入世貿所以立志轉做正行，點知生意從此一蹶不振，佢經常向大食Jack訴苦其他場都肯減租共度時艱，但月餅場就乜反應。早排有人喺舖頭貼急頂廣告，即被管理處撕去，警告以後亦唔畀再貼。聽佢講𠵱家有時一日生意500蚊都唔夠，過埋十五相信唔少舖閂門走人。
功夫L話亦有服務公司上門兜生意，幫佢哋轉做有限公司可斷租免上身，不過唔少人連幾千蚊都畀唔起，功夫L決定新年後爛仔鬥闊佬，一於拖租由得人哋封舖至算。希望新一年唔會再有商場租客業主糾紛喇。

主持人：大食Jack
八卦熱報：[email protected]