美國聯儲局宣布唔加息，重講明經濟下跌風險同通脹風險一樣高，市場開始憂慮加息。
呢次真大鑊，美國經濟復甦香港唔受惠，但港元就要跟住美元加息，樓市自然受影響。阿松又唔敢拆聯繫滙率，今次可以話係完全無計。現時香港只能寄望北水南調，惟有咁樣至可以搞活香港經濟，其實香港經濟一向都係泡沫，何必返轉頭要香港人腳踏實地呢？
品質（243）停牌，話就話會宣布股價敏感消息，市傳佢只係撥回5000萬元咁大把，但唔知點解要停牌。如果傳聞屬實，可能俾人「噓」到佢暈。

電盈債重怕加息
美國加息，地產股自然受累，不過剛剛俾高盛調高投資評級嘅電盈（008）相信亦唔好受，因為電盈負債成60億美元，勁過好多地產商，如果美國加息，電盈肯定唔使派息。
上海置業（1207）午後停牌。ｉ師傅話，公司以先舊後新配售8000萬股，重可以加碼至1億股，每股作價0.99元，最多可集資9900萬元。配售價較停牌前折讓8.33%。不過，此股由0.45元水平乾升至逾1元先至配股，配完股之後會點玩法，就真係天曉得！
噚日晨早傳出有中國石油股可能配股集資，即時令中石油（857）及中海油（883）回軟，但其後完全冇動靜。其實中石油要配售都返國內配A股，點會喺香港賤價配股。
有炒家話華德豐（297）隨時會停牌，有大動作跟尾，但此股噚日再跌9%，收0.425元，與近期高位0.70元差咗一截，要反彈都有排搞。