兩年前洪良（946）爆煲，證監會日前公佈史無前例咁重罰保薦人台資兆豐資本，但會否追究幾名負責上市的兆豐員工，仲係未知數。但我哋知道，當年兆豐幾位負責IPO的高層，依然喺金融界行走江湖，好似兆豐前董事總經理康曉龍，好大機會已轉行去做財經顧問公司，仲喺中港兩地開班授徒，教授企業管治的課程，應該有大把第一身體驗可以分享。
2010年初，上市不足三個月的洪良旋即爆煲。當時傳媒追訪負責洪良上市的康曉龍，先發現佢同兩名高層早已各散東西。

前身倍利證券的台資券商兆豐，2002年開始活躍於香港資本市場，保薦一些中小型中台民企上市。康曉龍喺2003年加盟兆豐，其間多次接受訪問，力銷台資股IPO前景。自2004年起，康曉龍高調現身多隻兆豐任保薦人的IPO記者會。2010年初離開兆豐之後，曾經有傳聞話康曉龍獲另一間證券行的聘書，但佢多項證券牌照至今都冇再續期，相信已冇喺證券行工作。不過我哋發現，有一位同名同姓的康曉龍，其實喺同年10月已加入邦盟匯駿顧問（BMIConsultants）公司做董事。
邦盟匯駿顧問專門為有意在港上市的公司做顧問，喺灣仔設有辦公室，母公司邦盟匯駿集團2001年曾經喺香港創業版上市。據公司網站介紹，康曉龍喺邦盟匯駿顧問擔任董事總經理，有十幾年投資銀行的經驗，履歷冇講明佢出身自邊間投資銀行，但提到康曉龍成功保薦30家香港上市公司，包括自然美（157）、安德利果汁（2218）、崚凌（1997）、新焦點等等，以上間間保薦人都係兆豐或前身倍利證券，所以好有理由相信此康曉龍，與帶領洪良上市的為同一人。

康曉龍亦都有為邦盟匯駿的培訓中心做導師，負責企業培訓課程。康曉龍有份教授的上市規則培訓課程，涵蓋董事責任、企業管治等的課題，有關課程仲獲得港交所（388）上市科認可。此外，康曉龍與其他幾個金融界從業員同會計師，為邦盟匯駿喺上海開班教授金融分析就業實務班，主要教金融分析理論。
至於洪良爆煲臨頭各自飛的另外兩位高層，依然喺行內任職。好似兆豐主管資本市場部的孫村華，先後去過海通、招銀國際，舊年中過檔信達證券。而另一位曾經喺洪良上市時公開露面的兆豐聯席董事黃麗洳，前年過檔招銀國際，一直至今。

港交所（388）董事會噚日一如所料選出周松崗出任主席，立即有證券業代表，搶韁話佢並非出身於金融業，質疑佢「外行人管內行人」。不過質疑之前，其實要認清事實，周松崗唔係港交所CEO，理論上唔使落手落腳管證券業。其次，其他國際大型交易所主席，唔少都出身於金融以外的行業，計我哋話，最緊要的條件，是在環球商界有冇足夠Connections，幫港交所擴大疆界。

事實上，除咗剛卸任的港交所主席夏佳理，專業是律師之外，現任倫敦交易所主席ChrisGibson-Smith亦如是。佢本身其實是地球化學（Geochemistry）系博士，70年代開始全職喺英國石油（BP），由低做到阿頭，服務至2000年。佢2003年擔任主席前，最相關的金融履歷，亦只係兼任當地一家銀行非執行董事四年的經驗。
至於成日同香港競爭的新加坡交易所，其主席周俊成，與周松崗一樣亦是出身工程界，72年加入新加坡航空，備受重用，扶搖直上到CEO，前年獲委任為主席之前，其實都好少金融界服務的往績。至於稱得上全球規模最大、幾年前合併而成的紐約泛歐證券交易所，其主席Jan-MichielHessels，60、70年代服務過英國投行SGWarburg（後來被瑞銀收購），之後就先後任職過荷蘭油漆公司AkzoNV等各行各業，才算係真正有投行經驗，同金融業息息相關。
以周松崗昔日服務過工業巨企如英國氧氣（BOCGroup）等，做過港鐵（066）CEO，亦以獨董形式坐過渣打（2888）董事會，現任友邦（1299）獨董，呢份履歷都算係同其他交易所主席差無幾，毋須挑剔佢並非出身金融。