我唔怕老實話你知，吸引我今季由活塞過檔到公牛嘅最主要原因就係錢！雖然我好想留喺活塞打到榮休，但係公牛畀我一份總值6,000萬（約4億7,000萬港元）嘅4年合約，足足比活塞多成800萬，而且第1年就有成1,600萬落袋，唔通我嫌錢腥咩？
過去6年，我場場打生打死，又攞咗最佳防守球員，入選NBA明星隊，最後連總冠軍都幫活塞贏埋，但係人工就平均每年只得雞碎嘅500萬，連一個新仔都不如！大佬呀！我已經喺活塞做咗6年廉價勞工，𠵱家難得有機會可以搵番多啲，唔通我仲扮清高sayno咩？況且我已經32歲喇，可以搵大錢嘅日子已經無多，唔趁𠵱家博番鋪，仲等幾時？如果對方出得起錢嘅話，莫講話公牛，就算超級魚腩黃蜂我都一樣照去，NBA就係咁現實㗎喇！鬼叫你窮呀！
冇人比我更加清楚窮嘅慘況。想當年，我全家有11個兄弟姊妹，我排第10，亦係8個男丁中最年幼嘅一個。我屋企冇電冇車，全家嘅食物同衣着主要係靠屋企後園所種植嘅小麥同棉花而來，我哋幾兄弟都要幫附近嘅農夫打工幫補家計。我真係唔想我3個仔女再過我童年時嘅窮苦生活，所以我一定要盡力搵錢。
除咗錢之外，我對桑達斯嘅執教作風亦不敢苟同。喺佢領導下，我哋失去咗活塞致勝嘅要素，就係teamwork同埋防守。上季初當我哋所向披靡時，好多人都話活塞將會取得70場勝利；但係大家卻忽略咗，我哋打防守已經冇以前咁拼搏，球員好多時都傾向自己射波，再唔願意去幫隊友做單擋同嘥咁多氣力去盯住敵人，或者去搶籃板同box-out，但係呢啲dirtyworks，先至係活塞成功嘅關鍵。