當年今日

股市身歷聲:證券行玩自我檢查

蘋果日報 2002/08/11 00:00


細價股股災到上個星期為止,又多咗一堆位列仙班嘅股份,當中不乏被斬倉嘅股仔。呢單嘢嘅後遺症除咗班細價股股東叫苦連天外,市場上重多咗一批「無主孤魂」,皆因好多證券行喺除牌機制公布之後,對於買賣低過兩毫子嘅股仔審慎咗好多。市場上重傳話有好幾間證券行為咗唔想至祥(112)單嘢喺佢哋身上重演,於是規定唔准同客買低過兩毫子嘅股票,實行玩自我檢查。
提起至祥單嘢,有行家話上次涉及至祥案嘅其中一個大戶,喺市場上四圍搵人開孖展倉按隻億勝生物科技(8151),話隻股仔已經被收乾貨,隨時被炒上去都唔定,重話唔需要按好多錢都得。

華脈傳有好戲上演
由於呢隻股仔只係得三毫零子,重係無乜成交,所以好多行家都唔敢做,尤其係個大戶之前個底因至祥單嘢搞到花晒,喺呢個時勢重講到咁有把握,好多行家驚咗,最好笑有個行家耍太極,話公司呢排太多孖展要做,無晒額,唔做佢生意。不過以伏勝嚟睇,呢單嘢都係小心為上。
另一隻專做物業投資、但後來改行做科技同通訊業務嘅華脈無線通信(499)近來好似有啲行動,雖然早前港交所(388)下令要將市面上所有5毫子樓下嘅股份殺清,好多隻股仔就咁一沉不起,但隻華脈無線通信喺嗰次跌咗落嚟後,就一步一步咁爬番上嚟。有班大戶同伏勝講,佢哋已經有一連串嘅嘢預備好要做,不過因為單細價股「屠城事件」,搞到佢哋唔敢郁手住,不過會先將個價推番高啲,以試試市場反應,佢哋話會將個價先推番上去一毫半左右,企得穩就會有連番好嘢推出。喺啲咁嘅市之中,伏勝就寧願乜嘢都唔做。
伏勝