馮仁昭四圍超:黃敏燁蘭桂坊搜獵律師

蘋果日報 2002/01/10 00:00


女優亞軍黃敏燁前晚約咗一女兩男,一共兩pair人去咗中環蘭桂坊消遣,黃敏燁之前口口聲聲話自己冇拖拍,但記者前晚就見到佢同一個穿深色西裝嘅男士結伴離開,而之前黃敏燁亦同排舞師林青峰同陳嘉上傳過緋聞。

被影相即彈開
黃敏燁同新男伴一見被影相,佢哋即刻好快反應同避忌咁彈開,嗰位西裝友馬上撇低黃敏燁走咗去搭的士離開,馮仁昭追問佢哋係咪拍拖,嗰個男人笑笑口冇答。再問佢到底做乜嘢職業,個男人竟然大方咁話:「做律師。」然後就搭的士走。
個男人走咗,剩低黃敏燁一個人截的士回家,佢話:「嗰個唔係我男朋友,我頭先同一班朋友食飯,佢(指男伴)係我啱啱識㗎,我哋真係唔係拍拖。」黃敏燁又話:「我最近搵到朋友幫我搞簽證,可以暫時留喺香港工作,以後唔使每兩個月就返深圳續簽證。而且我又接拍咗新片《新紮師妹》,會同楊千嬅有對手戲,我喺戲裏面扮一個心理醫生。」

郭晉安勉勵食白果女友
郭晉安噚日喺黃埔新城做薛家燕主持嘅《家天下》節目訪問嘉賓,安仔話前幾日先喺上海拍完同關詠荷合作嘅電視劇《燒餅皇后》返港,返到嚟有同過女友歐倩怡見過面,知道女友同華星嘅合約搞掂咗,𠵱家搵緊新經理人同唱片公司。雖然女友喺近期嘅頒獎禮食白果,不過佢話唔緊要,旨在參與吓,等下次機會。
薛家燕抱小朋友手軟
薛家燕噚日為無綫喜劇《皆大歡喜》打扮成十八歲卜卜脆嘅少女,劇情講述她回想以前尋找自己嘅三胞胎,導演更特別找來七位小朋友,而家燕姐更需同時手抱兩個小朋友,家燕姐話:「拍嗰陣好難控制,成日都要NG,又要一手抱兩個小朋友,手都軟晒。」

陳庭威三語拜早年
最近忙緊拍攝《八號巴士》嘅陳庭威,噚日以一身應節嘅紅噹噹衣服,回亞視總台拍攝賀年片段,而陳庭威更以廣東話、國語及潮州話三種語言預早同觀眾拜年,只見威仔潮州話相當流利,相信平時喺屋企梗係訓練有素。

鄧特希欲回巢TVB
東方魅力StarEast嘅東一製作公司𠵱家雖然重有製作,鄧特希都喺內地幫東一拍緊嘢,不過東一嘅財政好似遇到啲問題,鄧特希𠵱家都搵緊路鬆人,有傳話佢想回歸TVB拍劇,希望以部頭形式再返TVB。鄧特希以前喺TVB拍過唔少收視高嘅劇集,但出到去發展又唔多如意,似乎外邊搵食唔容易。