【赤鱲角機場】雨僑由B cup豐胸變C cup女，噚日朝早佢同男友羅力威拍拖遊日本，據知目的地係沖繩，兩個人一直唔認拍拖，終於斷正啦！朝早9點幾，雨僑單拖現身機場，佢戴cap帽遮素顏，一邊傾手機一邊行去國泰櫃位check in，冇幾耐，同樣戴cap帽嘅羅力威出現，佢哋仲着埋情侶連帽衫，真係浪漫。
戒心十足嘅羅力威現身後企埋一邊，贒清楚以為冇記者，先走上前同女友一齊check in，兩人情深對望，羅力威仲好有風度幫手攞行李過磅，有男友做阿四嘅雨僑，就好舒服咁坐埋一邊玩手機。之後佢哋去Starbucks坐低休息，今次輪到雨僑服侍男友，主動去買咖啡同西餅。

隨地棄煙頭

雨僑同羅力威坐低慢慢嘆咖啡，似乎怕有人認到，不時耷低頭細聲傾偈，冇耐有一男一女出現會合，佢哋食完嘢行去戶外煲煙，冇食煙嘅雨僑乖乖陪男友，羅力威食完仲將煙頭掉落地，好冇公德心！之後佢哋入閘，雨僑同羅力威刻意前後腳，借同行男女掩人耳目。
採訪、攝影：楊浩賢、彭琮然、黃文偉

想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/