求驗客手記:
踢走「天使」銀彈ready
紅魔瞄準 卡尼 巴利

蘋果日報 2015/05/16 00:00


仲有唔夠兩個月,轉會窗又重開喇!下季好大機會重返歐聯戰場嘅英超班霸曼聯,嚟緊會有咩超級球星加盟,繼續成為全球焦點,而紅魔行政總裁活華特就話,今個轉會窗會繼續大手入貨,而頭號目標係熱刺射手哈利卡尼,更豪言準備好4,500萬鎊(約5.5億港元),認真有霸氣!
empty
買完迪比唔夠喉
曼聯啱啱由荷甲勁旅燕豪芬以2,500萬鎊(約3億港元)簽入荷蘭國腳迪比,呢位21歲翼鋒就話希望幫紅魔鬼盡攬所有錦標,迪比咁識講嘢,相信唔少「魔粉」對呢位超新星都好期待。搞掂咗迪比之後,盛傳領隊雲高爾嘅主要收購目標,係今季喺熱刺踢到識飛嘅射手哈尼卡利,而且經已準備以4,500萬鎊將佢羅致。
21歲嘅哈尼卡利今季喺各項賽事射入30球,係自連尼加之後,熱刺陣中首位一季內有30個士哥嘅球員。雖然卡利喺二月先同熱刺簽咗五年半合約,不過雲高爾仍然希望將呢位早前贏得英格蘭職業球員聯會(PFA)最佳年輕球員獎嘅射手收歸旗下,進一步增強球隊鋒力。
empty
除咗卡利,紅魔今夏嘅另一重點收購目標就係皇馬球星加里夫巴利。有指曼聯將會放棄箭頭尹佩斯,同上年夏天以破英國轉會費紀錄加盟嘅阿根廷翼鋒迪馬利亞,去換取加里夫巴利嘅來投。據英國《鏡報》報道,紅魔對巴利一直相當有興趣,為騰出等佢加盟嘅空間,球會願意出售RVP同去夏以5,790萬鎊來投嘅「天使」,咁就可以慳番50萬鎊周薪,有助爭取「一億男」加盟。
「一億男」皇馬失意
我求大俠就認為巴利近期表現失色,仲成為皇馬球迷針對目標,或者會促成佢考慮把握機會轉投紅魔;呢位威爾斯翼鋒爆發力強,而且之前喺熱刺效力咗六個球季,一早適應英超嘅踢法,如果下季真係成功入「魔」,作用肯定比今季越踢越沉嘅迪馬利亞大好多。
另外,多蒙特守將曉姆斯、修咸頓翼衞尼達利基尼同摩納哥中場干度比亞等等,盛傳都係曼聯嘅收購目標。
識睇,一定係睇足英台【英波Live】:
http://soccer.appledaily.com
http://bit.ly/engballlive