花絮
蘋果日報 2002/02/16 00:00
唔知喺咪場外有哨子賣關係，大球場噚日兩場賀歲波，就經常有球迷（圖一）亂吹雞影響賽事進行，好似中國對斯洛文尼亞臨完上半場前，就有一吓由場邊而嚟嘅完場雞聲，幾可亂真，搞到斯國後衞加歷以為完場，重用手執起個波，最後當然係俾球證吹罰手球，認真搞笑。
中國今次嚟香港備戰世界盃，暫代教練話達到試陣及起用新人目標，不過有睇過中國隊比賽嘅球迷，都幾擔心佢哋世盃嘅表現，好似噚日有唔少球迷大叫中國隊回水就知佢哋有幾不滿。總結中國隊今次之行，最大收穫可能就係練咗兩課十二碼囉。
賀歲波已經變成國際性賽事，好似亞洲足協秘書長韋立本（圖二中），年年都會抽時間喺呢段期間嚟香港睇波，今年亦唔例外。不過，由於今屆賽事適逢世界盃前夕，韋立本呢位亞洲球壇舉足輕重嘅人物，老記們又點會放過訪問佢嘅機會啊。