新登場嘅融資界年輕才俊真係厲害，首次推介嘅科建（563）噚日復牌，勁升28.4％，收12.2仙，脫離仙班。不過，小初見隻股成交始終唔多，所以都係同隻股短聚一刻，就沽貨賺錢走人，等第二時再收到料先至食過返尋味。
講完科建，小初又想講吓金禾（090），好彩上次金禾急跌40％嗰日，小初冇買入博反彈，如果唔係今次金禾玩供股，小初就會輸鋪勁，噚日隻股復牌，急跌26.7％，收4.4仙。
上次力阻小初買金禾嘅經紀陳，今次又有古講，佢話雖然金禾只係玩2供1，供股比例唔算大，但佢覺得成個部署似係唔想其他股東供股，尤其係金禾今次搵外援幫手，就更加可疑。
佢話金禾搵咗近排同人鬥緊氣嘅大檸檬幫手坐陣，按道理佢係一個無寶不落嘅人，無端端肯幫手，事出必有因，故此要繼續睇住。
慕容小初