家陣啲賭網真係搞到冇嘢好搞，居然連本港樂壇頒獎禮都賭埋一份！一年一度嘅「十大勁歌金曲頒獎禮」會喺下個禮拜日舉行，呢類每年盛事成日俾人話結果內定，不過賭網《易勝博》就偏向虎山行，喺網上大開賭局，接受「金曲金獎」同最受歡迎男女歌星嘅投注。
幫《易勝博》做技術顧問嘅朋友同八方講，已經提咗《易勝博》，呢啲咁嘅樂壇成績表，未公布就會有人知道結果，但係《易勝博》唔志在，主要目的都係做推廣。主辦單位無綫嘅外事部總監曾醒明就話，唔多高興見到一個提供娛樂嘅節目沾染賭博元素，不過無綫亦無可奈何，但佢聲明勁歌金曲賽果保密極之嚴格，唔怕被人利用賺大錢。


E-mail：[email protected]