穿低V裙惹火剪綵
馮仁昭四圍超：陳法蓉俾老闆掂屁股
陳煒、陳法蓉（Monica）、李彩樺同鮑起靜前日應澳雪產品嘅老闆邀請，去咗中山嘅新辦公室剪綵。佢哋出現吸引咗幾百個途人圍觀，現場氣氛好鬼熱鬧。
Monica感尷尬
Monica前日着咗條低V裙出席剪綵，性感又惹火，連澳雪產品公司嘅黃老闆都對佢特別殷勤。當黃老闆同Monica合照嗰時，可能黃老闆好想同嘉賓嘅距離拉近啲，佢就伸手想搭住Monica，但係隻手又唔知放喺邊度好，最後黃老闆居然將隻手放咗喺Monica嘅屁股，在場人士見到都即刻「嘩」一聲，Monica頓時一臉尷尬，都咪話唔搞笑。
鮑起靜鑽戒失而復得
鮑起靜前日喺中山出席一個剪綵活動，大會安排嘉賓喺台上「飛」利是落台，送畀啲觀眾，吸引幾百個在場觀眾搶利是。
但喺混亂期間，鮑起靜話自己唔小心將尾指隻鑽石戒指連同封利是都飛埋落台，佢重話：「隻戒指買咗成六千蚊，我都幾肉痛㗎。」
但事後，鮑起靜竟然喺手袋度搵番隻鑽戒，你話佢幾咁烏龍。
玉女多人錫難搵拍檔
玉女有愛情滋潤後，成個人都唔同晒。不過馮仁昭聽一啲幕後人講，話好多導演同演員都好怕同佢合作拍戲，因為電影公司錫住佢，工作一定以佢為宣傳重點，最近佢公司開賀歲片都有預埋佢一份。
不過電影公司搵其他演員演出時，啲人始終覺得煩，因為乜嘢都要就晒個玉女，如果其他演員啲戲搶過佢，自然會有人幫佢出面，然後刪剪人哋嘅戲份。佢間公司若果再繼續咁幫佢，遲早會惹起其他演員不滿！
李文彪留醫冇紀錄
李文彪為向無綫宣洩當年工傷賠償問題嘅不滿，禮拜日硬闖紅館，大鬧保良騷。事後李文彪以身體受傷為理由，入咗九龍塘浸會醫院留醫，有消息指佢噚日會出院，但記者噚日去醫院探佢，佢竟然唔喺醫院。記者問醫院嘅工作人員，佢哋話：「我哋未有佢嘅入院紀錄。」令人懷疑李文彪有冇喺醫院過夜，佢真係神出鬼沒。
男藝員專博臨記懵
有個二打六男藝員，成日喺啲劇集入面扮差佬角色，但佢份人就啱啱同做嘅角色掉轉，衰格到冇人有。
佢一向同啲臨記好熟，有時佢見啲老臨妹精神恍惚，喺收工後就以約人哋消夜為藉口，食完嘢趁送人返屋企嗰陣，竟然借機博懵，而且唔止發生過一次。所以二打六喺老臨界簡直神憎鬼厭，𠵱家啲老臨妹離遠見到佢，都即時搵路走。
Shine拍戲撞腫嘴
二人男子組合Shine呢兩兄弟分別都拍咗唔少戲，最近有一套新戲搵咗兩兄弟合作，叫做《五個嚇鬼的少年》。
唔好以為成班後生仔合作好好玩，點知Shine兩兄弟拍到冇得瞓，成把聲沙晒，重成日整損手腳。徐天佑話有一次個劇本要佢撞埋個木乃伊度，最後撞到個嘴都腫晒，佢真係慘！
黃凱芹同周慧敏唱K
黃凱芹（Chris）噚日去港台接受訪問，佢話十月嘅演唱會好想請番以前寶麗金嘅歌手，而李克勤同譚詠麟已經答應咗做表演嘉賓。另外，阿Chris重話早排同周慧敏去唱過兩次卡拉OK，佢重讚Vivian唱得愈嚟愈好聽㖭！