用車報告：
歐寶Zafira用家報告 賣相設備皆吸引
Zafira中型七人MPV車，可算係德國歐寶汽車重新打入香港市場之作；新車除備有突出嘅造型，以及不俗嘅性能表現外，當中15萬多起嘅售價，更成為新車嘅賣點所在。至於今日《用車報告》嘅主角Candy，亦因為上述原因而購入Zafira2.2作座駕；咁究竟車主Candy重對Zafira有何評價呢？有興趣嘅朋友，就不妨留意吓喇。
記者：鄭達基 攝影：陳穎
Candy選擇Zafira兩大原因
原因一
賣相突出安全感強
喺購買呢部Zafira2.2中型七人MPV車作座駕之前，Candy與他丈夫正想以20萬以下嘅價錢購買一部七人MPV車，用以取代已沿用多年嘅座駕；而佢哋亦曾到過各大汽車代理商如本田及萬事得等等嘅陳列室參觀過。後來當Candy兩夫婦到歐寶嘅陳列室參觀時，就被Zafira嘅獨特賣相深深咁吸引住；另外，予人頗高嘅安全感，亦係Zafira令Candy兩夫婦對其心動嘅原因之一；故此佢哋便於去年11月以18萬多嘅價錢，購入現時呢部Zafira作座駕。
原因二
空間寬敞行車寧靜
而作為乘客時間較多嘅Candy，則認為Zafira嘅車廂空間，較部分同級車要來得充裕外，就連乘坐舒適感亦較佳；當中最令Candy滿意嘅，就係車內嘅中、後排座椅可按需要而收摺放平，以便騰出更大嘅車廂空間，用作擺放行李之用。除此之外，Candy又認為車內嘅設備配搭以實用為主，使用方便；當中車內嘅獨立冷氣送風口，更係Zafira嘅過人之處㖭。
至於性能表現方面，Candy覺得Zafira除起步加速有勁外，行車時又見穩定及寧靜，此舉亦係Candy對Zafira心動嘅原因之一。
售後服務
到最後，Candy又認為歐寶代理嘅售後服務，絕對能令其感到滿意；除維修服務處嘅接待員對顧客甚有禮貌外，而且重頗有交帶，當中若未能於預定時間將車子交回Candy，維修中心嘅職員會主動致電予Candy交代一切，從而為Candy帶來不少方便，服務質素之高可見一斑。
欠缺天窗稍嫌不足
缺點
雖然Candy認為Zafira所畀到佢嘅印象係優點多過缺點，但仍有部分地方係令Candy感到不大滿意嘅，而呢個缺點就係Zafira欠缺天窗配搭；若用家想為Zafira配置天窗的話，就要放棄後排嘅冷氣送風口。相信廠方若能將呢個缺點改變過來，定會令Zafira更受用家歡迎。
歐寶Zafira小檔案
於年前重新打入香港汽車市場嘅歐寶汽車，為爭取更高嘅市場佔有率，故特別於去年年初，引入以中型7人MPV車形象出現嘅Zafira，實行與一眾日製同級對手，如豐田Picnic及本田Stream等車爭一日之長短。當時Zafira以一台1.8公升直4偈作主打，並以約16萬嘅價錢推售；後來於去年五月左右，再引入以一台2.2公升引擎作動力核心嘅2.2公升型號。而代理為吸引更多車迷，更特別為2.2公升型號加設全車包圍，並將之定名為Zafira2.2Irmscher，及以唔到19萬嘅價錢發售，同樣廣受車迷歡迎。