團體促於兒童醫院設「無障牙科」 特殊兒童有全面配套可減恐懼

蘋果日報 2018/03/26 15:05

學童牙科保健香港兒童醫院家長組織座談會盈愛.笑容無障牙科張超雄食物及衛生局公立醫院郭家麒

【新增影片】
位於啟德的香港兒童醫院將會於2018年分階段投入服務,由智障或肢體弱能人士的家長會所組成的家長組織座談會,促請將會成立的兒童醫院,應該要為特殊需要的人士設立「無障牙科」的專科服務,「特殊需要嘅學童如果有牙患就係不可逆轉,嚴重嘅話20歲就可能無晒成棚牙,變咗食糊餐嘅人生」,
家長組織座談會表示,現存醫療制度沒有涵蓋特殊需要人士的常設牙科服務,倡議兒童醫院應增設相關服務以填補「學童牙科保健」的不足,「而家我哋去到公立醫院睇牙科,但特殊兒童可能對於個環境會有恐懼或者不安嘅感覺,去私家診所,因為醫生無相關處理嘅知識或者經驗,於是又會拒絕提供服務」。她們認為兒童醫院的環境能減低特殊需要兒童對於接受治癒的恐懼。
立法會議員郭家麒指出,在兒童醫院為特殊需要兒童增設牙科服務,是因爲兒童醫院有全面性的醫護配套,「世界上好多地方都有兒童醫院,香港係後起之秀,其實兒童醫院係最適合增設無障牙科專科,因為佢地有時唔係剩係得牙科嘅需要,好多都有先天性嘅疾病問題,好似特殊需要兒童,醫生為咗令佢地唔掙扎,可能就會打全身麻醉或者靜脈注射,呢啲嘅風險都係高,而兒童醫院會有隊麻醉科嘅醫生」。
食物及衛生局於2013年推行、為智障人士提供牙科服務的「盈愛‧笑容」先導計劃,去年已結束,立法會議員張超雄指,他的女兒也曾經使用過「盈愛」的服務,「但計劃完咗之後,點搞下一步呢,公立醫院都有排排,兒童醫院係最好嘅地方,去集中資源同埋人手」。他又指,為特殊需要兒童提供牙科服務應該要納入長遠的政策規劃中。
家長組織座談會認為,除了設立「無障牙科」專科外,也應該為特殊需要兒童提供牙齒健康的教育,「因為牙嘅問題會影響到其他嘅身體健康或情緒嘅問題,所以好重要」。

《蘋果》沙士15周年系列網站,正式登場:
https://hk.feature.appledaily.com/sars15
empty
(李潤芳攝)
empty
(李潤芳攝)
empty
立法會議員張超雄指,為特殊需要兒童提供牙科服務應該要納入長遠的政策規劃中。(李潤芳攝)