當年今日

隔牆有耳:狼英2013𤓓劇完結篇
齊歡唱:丟佢路姆西 - 李八方

蘋果日報 2013/12/31 00:00


上回提到,狼英去到邊俾人狙擊到邊,民望插水,保皇黨誓要幫佢急救。左派為挽頹勢,趁回歸搞7.1維穩騷,請來RubberBand助拳,試圖搶走7.1遊行客源。有騷接、理論上有歌酬嘅RubberBand就形容,喺保皇黨台上獻唱猶如被強姦,哦!同日舉行嘅7.1遊行,43萬人上街。
故事高潮由10月開始,狼英拒向香港電視發牌惹起公憤,事件同時引爆市民對CCTVB、CCATV多年不滿。12萬人上街、集會高叫還我電視選擇權。狼英企硬,民望下跌至40分第N次新低。兩個月後,魔童王維基另闢蹊徑開台,振奮人心。
講到呢度,屈指一算,今年共有七位梁班子成員因醜聞請辭或者跳船,城中亦有唔少中產計劃移民向狼英說不。離不開的,惟有靠搶購寓意狼英下台嘅路姆西洩憤,但最估佢唔到嘅係,喺路姆西俾萬民搶購得水深火熱之際,狼英竟然與民爭利,搶埋一份,仲影埋相放上網大晒路姆西。唔通,佢都想自己下台?
第7集 保皇黨7.1搶客
陸金記瓜子、花生五折,米蘭站LV、Gucci八五折,海天堂買滿71蚊送你龜苓膏贈券一張(後來發現原來冇龜喎)。唔係零售界要劈價救市,而係保皇黨要搞大減價救民望呀!7.1風頭火勢,北京又係時候出動維穩費「救市」啦。於是呢,左派咪趁回歸16周年搞7.1維穩騷囉。左派呢鋪都算毒啦,請咗形象上好似幾敢言嘅RubberBand,喺維園對岸啟德舊機場跑道獻唱,試圖搶走7.1遊行客源。有騷接、應該有歌酬嘅RubberBand,即時俾網民圍插,但佢哋又真係跑慣江湖喎,喺網上吐苦水話,佢哋覺得呢,喺保皇黨台上獻唱猶如被強姦。哦!好彩佢哋都身在曹營心在漢,7.1當日唱完歌,就同43萬人一齊上街倒狼(圖)。
empty
第8集 囤地波唔認仔
集集唔係喺門常開取景,就係喺維園,今集同大家去遠啲,跳出港島區,嚟到偏遠嘅新界東北。今集要感謝塵謬波,佢喺東北囤地,醜聞曝光,竟然仲可以賴死唔走,令到香港人見識到狼英管治下嘅官場新倫理。感謝塵謬波,佢解釋囤地公司係由「太太及太太的家人」持有,再次令到全港市民認識到,原來介紹自己個仔,唔一定要講佢係自己家人,可以換個講法,稱呼自己個仔做「太太的家人」。
喺謬波最失意嘅時候,東北大地主、上水鄉委會主席侯志強唔知算係雪中送炭,定係火上加油,佢喺立法會一個委員會上,大大聲力撐囤地波話:「一個人到四、五十歲,一啲物業都冇,乜都冇,呢個人廢人嚟㗎啦!」
但係咁都救唔到謬波㗎,佢喺呢個月就相當黑仔,晨早流流喺跑馬地炒車,扭傷頸兼頭暈送院。落白車一刻,仲要俾記者追問:「局長你今朝有冇飲酒呀?」鬼叫佢個底唔好,俾《蘋果》踢爆過佢飲完啤酒開車咩!
empty
第9集 學者幫港滅聲
「愛字堆」實在太爛仔格,影響觀眾品味。呢個月阿爺決定推出維穩新品牌,由「幫」字頭加入反佔中。由過氣名嘴周融牽頭嘅幫港出聲拉雜成軍,接力向戴耀廷開拖。頭炮係幫字頭成員、經濟學者雷鼎鳴,話港人為免中央拒絕任命普選特首,應要求日後特首宣誓時,承諾任內「一定積極推動23條立法」。鼎爺好快就俾人踢爆,原來佢04年曾公開狠批23條「箝制學術自由工具」,俾人恥笑佢係「幫港滅聲」。
empty
第10集 菲國玩謝狼英
狼英眼見自己喺香港冇得發圍,於是乎咪走咗去APEC,再搞吓「外交」囉。佢處理馬尼拉人質事件,一直冇乜建樹,呢次就懶叻咁樣,「成功爭取」咗同菲律賓總統阿奎諾三世「會面」。但係外交真係形勢凶險咯!佢老哥一坐低,就有唔妥啦。首先,阿奎諾三世坐喺正中,狼英被安排坐埋一邊。
喺坐位安排上,蠢狼先俾老狐狸跣咗一鑊。之後喺發佈消息時,狼英又俾對方再過一戙。隻狼對香港傳媒話,未得對方同意,唔可以披露會面內容。點知菲律賓其實早已圖文並茂,報道晒雙方會面內容。仲有呀,佢同阿奎諾三世之前傾偈期間,俾傳媒影到狼英得意忘形,笑到見牙唔見眼,令人質疑佢究竟有冇心為人質家屬爭取對方道歉!喺APEC採訪期間,香港記者因為向阿奎諾三世提出尖銳問題,俾主辦單位粗暴沒收採訪證件。說好了要捍衞新聞自由嘅狼英,就完全幫唔到手。
empty
第11集 保皇黨搵窿捐
有冇試過俾幾萬人圍住你爆粗?如果你未試過,證明你唔係出賣香港人利益嘅立法會保皇黨。喺呢一個月,故事主角唔單止係「一籃子」同「一男子」,仲有30件喺立法會投反對票,同六件投棄權票,阻止引用權力及特權法查政府就免費電視發牌黑幕嘅保皇黨議員。
聽班保皇黨發言,你會發現佢哋好可能係手腦不協調㗎。好似地產界石禮謙咁,佢話「今日投票贊成嘅人,係良心投票」、「今次牌照事件係走向計劃經濟、行政干預」但最後佢就投咗反對票喎。
工聯會黃國健就話,港視被裁300幾人「的確係不幸」,但王維基係第一責任人,係裁員始作俑者。投票前一晚,五萬人喺立法會外集會,保皇黨議員俾群眾喺立會門外爆粗怒罵。喺呢一役,大家亦發現咗,立法會原來有一條通過政總停車場嘅秘密通道,等保皇黨有事時可以速逃。
empty
第12集 全港丟路姆西
1月嘅主角係熊,到咗年尾,終於又輪到隻狼威番次。不過今次唔係狼英個狼,而係一隻名叫路姆西(Lufsig、現改名路福西)嘅布公仔小野狼。呢個月狼英又落區挑機。示威者向佢掟蛋,誤中財爺鬍鬚曾。財爺想輕鬆回應兩句,點知隻狼發老脾,話要依法追究,叫鬍鬚曾唔好講嘢!
同場仲有社民連金鷹曾浚瑛,向狼英怒掟路姆西,結果呢隻喺宜家家居有售嘅布公仔一掟成名!人人爭住搶購,諗住買番隻掟吓,以洩對狼英亂港心頭之憤。話咁快全港路姆西被搶購一空,喺內地、台灣、美加、泰國都掀起搶購潮。全球華人熱搶路姆西,諗住用念力掟到狼英下台。點知呢,狼英就肉麻當有趣,唔知透過乜嘢途徑,竟然俾佢搶到隻路姆西,仲同呢隻布公仔合照,放上特首網誌呃like。佢話自己與狼共桌,但有網民就認為,呢鋪係路姆西與狼共桌先啱。
empty
有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange