《黑鷹15小時》內的士兵個個差唔多樣，可能冇一個演員你噏得出名，但其實只需認定一個金漆招牌——大導演列尼史葛，水準便得到肯定的保證。
列尼史葛為港人熟悉的作品有《異形第一集》、《末路狂花》、《帝國驕雄》與《沉默的殺機》，全部犀非利，齣齣都係堅嘢。在《黑鷹15小時》內，除了看到導演的功力，更看到他的魄力。電影的影像極其壯闊有力，拍攝的地點簡直就像是真的陷入戰爭當中一樣。除了要指揮直升機、軍車、坦克車、大量爆炸場面之外，還有數以千計的群眾演員，真係睇見就戥列尼史葛煩，少啲體力都頂唔順。
大家都知道美軍的裝備精良、訓練嚴謹，在戰場上應該是無敵之師，但在列尼史葛的鏡頭下，美國新兵就像是一群少爺兵，空有一身訓練，但缺乏經驗，大部份未上過戰場、未殺過人；面對的敵人雖然拉雜成軍，但殺人絕不手軟，於是觀眾便很為這群美國新兵擔心。不過又不是純硬橋硬馬，戲中有兩名被遺留在戰場的美國大兵，二人帶點烏龍地排除萬難會合大隊，過程緊張中又帶點輕鬆，真係服到五體投地。
列尼史葛的兄弟東尼史葛也是一位大導演，作品包括《TopGun》、《紅潮風暴》、《浪漫風暴》與《高度反擊》，名副其實一門兩傑。
史葛兄弟應該可以將精子高價售給精子銀行，因為他們的遺傳基因內理應有大量電影密碼，史葛兄弟話唔定可因此發一筆大橫財。