【《真三國無雙》又有新造型 】人中古仔揈曱甴鬚 就快打到去新西蘭

蘋果日報 2017/10/14 17:56

古天樂真人版呂布真三國無雙

真人版電影通常都令人好絕望,由造型、身高、髮型等等都令人睇到好痛苦。不過蕭定一投資嘅《真三國無雙》就有少少令人期待,呢套電影都幾保密,好少泄露角色造型。之前蕭定一就放過風,擺過幾張呂良偉嘅相,見佢成身袁紹打扮,真係入型入格。
呢套電影好多人參與,除咗呂良偉,仲有古天樂演呂布、王凱演曹操、韓庚演關羽,仲有劉嘉玲、楊佑寧同古力娜扎等等。
早排導演周顯揚同監製杜緻朗先後生日,劇組為佢哋慶祝,呢場飯局古天樂都有到,一早公佈咗造型嘅呂良偉之外,另外仲有啲拍攝現場相,包括好罕有見到背影嘅呂布,頭上標誌性嘅兩條曱甴鬚(正名叫翎子 )彈下彈下,氣勢話俾你聽就係古天樂。另外仲有張相,都係剪影嚟,就見到拎住丈八蛇矛嘅張飛同埋相信係關羽同劉備兩個角色。
據知《真》片喺象山趕緊工,遲啲會去新西蘭拍外景,而韓星金在中早排專登去咗象山探好友韓庚班,周顯揚仲放咗佢同韓庚、金在中一齊比試手臂嘅相照。