搞咗一大輪嘅SHARPV902SHSIMLock問題，上個星期終於都搞掂。200萬像素鏡頭加埋ASVCGSilicon靚芒，如此機王，當然間間舖都入番幾部睇門口，而且橙、灰、白三色齊全，真係唔係得銀色咁鬼悶。根據供求定律，供應多價錢自然平，所以價錢亦都冇月頭嗰時咁開天索價，基仔問咗幾間舖，大約都係Keep住5千蚊左右，都叫做係合理價。不過對於基仔呢類窮鬼用家，當然都係得個睇字，據聞價錢短時間都唔會再跌住，惟有得閒再去手機舖聞吓玻璃罷啦！

文：尹謹基

MP3手機今期大熱

可能鏡頭唔平，各廠商玩完百萬像素鏡頭之後，200萬像素影相手機總未成氣候。所以好多廠商都轉移目標，用另一樣實際又有賣點嘅「分唇」：MP3播放，嚟做新機賣點。今期就輪到台灣廠商接手，例如BenQ嘅Qube及ASUS嘅M303，前者未嚟到香港，而後者就已經賣緊街，雖然個樣就鈍咗少少，不過聽埋歌同埋有個百萬像素鏡頭，叫價都係$2,300至$2,500左右，都算合理。

法拉利V902SHCrossOver

又多單料關於V902SH，冇計啦，鬼叫呢期人哋紅咩！喺網上蒲開嘅都可能見過呢部法拉利版V902SH，上個月喺德國Cebit曝光，成部機紅噹噹之外，機面有法拉利Logo，Wallpaper亦都係法拉利！將基仔嘅DreamCar同DreamPhone合而為一，睇見都一地口水！據聞下個月就有機會嚟香港，賣唔賣就重未知，不過價錢一定唔慌平，畀基仔拎上手玩兩吓都已經於願足矣！