當年今日

股場放大鏡:會地炒星洲概念?

蘋果日報 2006/10/13 00:00


九倉(004)系公司噚日有隻異動股,就係會德豐地產(049),股價單日急升10.4%,呢隻股一向牛皮,噚日則異動得好緊要,而且成交增至2.5球,喺過去1年從未見過咁大成交。會地異動,但系內其他公司股價卻無乜特別,九倉跌0.3%,會德豐(020)跌0.4%,海港企業(051)得5000股成交,冇升跌,因此,唔似係炒系內重組。
唔係重組,會唔會係炒私有化?系內年前想將海港企業私有化,但唔成功,市場亦傳過控股公司會德豐可能私有化,但至今只聞樓梯響,反而去年擬全幢標售連卡佛大廈,曾惹起市場憧憬係集資私有化會地。
會地近年搞跨國地產業務有聲有色,早幾年已透過會德豐新加坡(前稱馬哥勃羅)在地產低潮時低吸日本、新加坡及英國物業,尤其新加坡,已由當地發展商初哥,變成主要發展商之一,噚日隻股咁升法,可能係炒新加坡搞賭令地產升值概念。
內地「十一.五」規劃提出要加快發展風能、太陽能等可再生資源,2020年前將再生能源比例增至佔整個國家能源供應的15%,不過具體細節仍有待落實。
歐洲國家鼓勵太陽能產業有唔少政策,包括稅收、光伏並網以及太陽能電價定價機制等,搞緊光電業務嘅華基光電(155)噚日股價升4.2%,市傳正是炒國內會喺短期內公布相關政策,華基可望食正國策。
歐陽風