「患難見真情」呢句話一啲都冇講錯！最近被控性侵犯一名十九歲少女嘅NAB湖人球星拜恩，唔單止搞到聲名盡喪，如果罪名成立，重可能最少要踎四年監。但係剛剛為高比仔生咗個囡囡嘅雲妮莎，唔單止冇因為老公爛滾而大動肝火，反而對佢不離不棄，一直喺背後默默支持高比仔，真係百分百嘅賢妻良母！
為咗報答愛妻嘅支持同贖罪，高比仔前幾日不惜一擲千金，專登買咗一隻價值成四百萬美元（逾三千萬港元）嘅八卡紫色鑽石戒指，嚟𠱁老婆大人happy，而且個設計師重係兩年前為佢哋設計過結婚戒指。如果呢三千萬可以挽救到婚姻，當然是物有所值啦！

烏甸做囚犯不枉此行
烏甸尼斯着黑白直間波衫不嬲都被人話似囚犯衫直間版，佢哋早排訪問監獄兼踢場友賽時，名副其實上演囚犯隊對囚犯隊。結果烏甸喺呢場玩票性質嘅比賽輸六比八。賽後有囚犯笑言：「我哋贏在『集訓』時間夠長。」為囚犯帶來歡笑同消消氣，烏甸可謂不枉此行。

柳澤敦一帆風順
舊年中村俊輔因為喺季前熱身賽踢得好，增加唔少比賽信心，果然上季喺里賈納交足貨。佢同胞柳澤敦都唔失禮，喺日前森多利亞贏地方球隊十六比○場波射入五球，會方讚不絕口。咁啱隊友兼競爭對手馬拉仙拿又養緊傷，睇嚟柳澤敦暫時都真係幾順景喎。