我的世界盃癲狂後遺症發作，已經第四天，自療相當困難，惟有禁止自己重看賽事。方法是幻想球員是在場中心耍太極，麻甩佬收起晒腹肌與甲組腳，沒有美妙的香蕉型柔射，只是集體表演慢動作，有甚麼好看呢？成功將誘惑降溫，呆在廳中扮德國球迷，不斷呢喃，SeeyouinGermany2006！
但2006畢竟太久，我的世界盃空虛幻覺症時好時壞。當電視播出董特首連任的宣誓畫面時，我竟然看到平頭裝的老董，忽然剪了個《文匯報》形容的朗拿度「仙童頭」！嘩，跟在座拍爛手掌的保安局長的小R甸奴頭，湊成2R，香港真係一定得！巴西登上盟主寶座，今次剛好是第五回。五屆波霸，跟香港回歸五年，玩猜枚似的前呼後應。老董連仙童都「上頭」，肯定是想冧莊，做其五年冠武林盟主。五四終二十，條數係咁計，老董還要一屆又一屆地連任下去。我的主耶穌啊，誰能解構這個嚇死香港人的惡兆。成個新貴款的劉兆佳教授能嗎？電視台訪問他，天呀，連老劉也梳了仙童頭！他滔滔不絕，分析時有意無意間，露出比朗拿度更朗拿度的哨牙！看來他隨時會來一下插花、扭過記者、以金靴右腳勁射——電視新聞觀眾的我首當其衝，食正他的波餅！特區翻版R，爛打格毋容置疑，R頭是剪了，有冇搞清楚龍門在哪裏呢？失去信心的市民，未來還要捱幾多記波餅呢？唉，我扭去體育台，睇個個着得像醫護人員的溫布頓，頂住癲癮，避開特區仙童黨。