只不過例牌式問問，現屆工程界立法會代表、經民聯盧偉國有何政績……「真係冇乜記憶喎」、「揀啱佢意見人士去諮詢囉」、「除咗撥款就係撥款」，冷空氣突然冒出一股熱。當工程師被看成站在市民的對立面，只懂支持政府撥款搞「大白象工程」，忽略應有的專業分析，覺醒就是時候。3名80後工程師去年中成立「工程思政」力抗業界白色恐怖，其後推動業界登記做選民，尤其呼籲由「超級區議會」界別轉回工程界；錯失太易，轉組勿太遲，光復工程界，要的或是含金量極高的這一票。

「叫我哋轉返過嚟，有冇人選畀我哋揀先？」董仲賢（Gary）、伍焯煒（Alex）及張振傑（CK）接受《蘋果》訪問時不約而同指，這是呼籲業界由超區轉回工程界做選民最常遇到的「疑問」，Gary稱部份選民可能不覺得在這個長期由建制派壟斷的界別有望改變結果，故此上屆立會選舉多達5千幾位工程界選民將該票投向超級區議會，他坦言組織仍在物色合適人選上陣，希望業界明白首要「轉咗界別先」，「否則有人選時要再轉就會太遲」。

Alex亦指反修例下全民覺醒，「有啲人未必可以出嚟遊行、未必可以喺前線抗爭，但最少可以投到呢一票」，提醒工程界這一票相對幾十萬票當選的超級區議會，含金量極高，「如果嗰5千幾票出返嚟，係咪可以扭轉局面呢？」

剛剛在區選一擊即中以素人姿態於東區撼低建制派當選的CK，深切體會進擊任何平台的重要性，以當年亦搶攻工程界選委為例，認為至少可起播種作用：「唔理個結果係乜，可能我哋做緊啲嘢，中途已經好多人會諗：佢哋做嘅嘢可能係有用㗎喎」。老掉牙的問題是，支持真普選、反功能組別，為何又要參與選舉、變相增加小圈子認受性？Gary稱無非考慮到現實：「現實係唔可以一步去到真普選，咁就要喺而家呢一刻嘅制度上打破」，他指界內顯然也有要求民主的聲音，「呢啲聲音需要喺議會被代表」。

2012年起當選、來屆料續爭冧莊的盧偉國，不能代表他們嗎？「唯一佢掛起口邊嘅嘢就係通過撥款囉！」CK指界內有不少革新工程運作的建議，政府因官僚拒推動，作為業界代表的盧亦沒理會，「入到（立會）就係過撥款過撥款過撥款」，未有履行專業的分析角色，他以高鐵西九站設圓方而非坊間建議的元朗錦上路為例指，立會代表不應因長官意志或政治大方向抹殺任何好的方案。Alex也稱工程界支持的是造福民眾的工程，絕非大白象工程，「唔係幾千億掟落海」：「佢（盧）依家做啲乜？得閒就整個newsletter嚟，話我又過咗幾多億……但係咪真係我哋想要嘅工程？佢都唔了解。」

Gary提及7月時工程思政曾向盧偉國提交反送中的業界聯署，希望將相關意見帶入議會，「結果係冇，佢完全冇覆過我哋」，「一個合資格議員，起碼要同佢嘅選民有交代。」而無論支持或反對，他認為工程界代表應向外提供客觀數據、專業分析，「唔係一味話『好嘢嚟㗎，你要啦』」，直指：「而家市民覺得工程師無論係政府話起乜，我哋都支持。」

由於立會代表予人保皇感覺，Alex認為令工程師也令人有此印象，「營造同市民喺對立面嘅感覺」，希望新一屆有新氣象，除了呼籲新登記選民5月2日前登記，特別提醒想由其他功能界別轉回工程界的選民，更改選民資料限期為今年4月2日，強調任何可以搶回話語權的方法也要一試。

記者　許偉賢

-----------------------------

民陣元旦大遊行