701收料站:抽水雙雄各有支持

蘋果日報 2006/01/21 00:00


大市升咗咁耐,終於有公司批股集資,噚日一早停牌嘅宜進利(304),據講批股集資約2.8億元。收市之後,亦傳出華潤置地(1109)配售新股,集資超過11億銀。根據傳統智慧,當陸續有大型集資活動出現時,大市已經升得差不多。
經紀黃話,宜進利同華潤置地都係近期嘅當炒股,重要係一齊創新完新高無耐就批股。
小初記得喺去年11月頭開始推介宜進利,當時股價喺1.80元樓下,估唔到事隔兩個幾月,股價已升咗1倍,停牌前報3.60元,人哋唔趁股價高企集資先至奇。
宜進利急升後批股,難免令人有戒心,但經紀黃話家陣流行大陸消費股,宜進利又大力發展大陸鐘表零售生意,應該有足夠捧場客支持。
至於華潤置地就更加唔使擔心,近排有美資大行吹捧,昨日再升4.52%,收4.05元。
慕容小初