貨櫃碼頭工人罷工已到四周，解決機會仍然渺茫，工人正部署新一輪行動，但以沙膽虹之見，罷工工人不如死心算數。和黃大班出來講話，面目猙獰，意思是又冇人揸住支槍指住你做呢份工，你唔鍾意咪唔好做，而和黃旗下香港國際貨櫃碼頭公司更連日登廣告，直指碼頭業務高峯期已過，景氣大不如前，工人薪水只是隨市場改變。照牌面睇，和黃妥協肯大幅加人工的成數極低，不滿公司待遇的罷工工人，不如趁機轉行，即使轉當地盤工、扎鐵釘板，薪水也不會較目前遜色。即使現時在貨櫃碼頭工作沒罷工的工人，亦要做好轉行心理準備，皆因將來貨櫃碼頭業務不斷轉移至深圳鹽田、蛇口和南沙，工人的談判籌碼只會越來越少。
李嘉誠冇死錯人，過去數年逐漸將香港貨櫃碼頭股權減持，至目前只剩下27.6%，肯定就是睇淡香港貨櫃碼頭業。君子不立危牆之下，工人亦要為自己的前途打算。