太古地產起嘅住宅一直廣受日籍租客歡迎，好似鰂魚涌逸樺園，五宗租務有三宗係日籍客。
中原高級分行經理許志凌話，二座中高層A室，千多呎，三間房，啱啱由日資公司承租，每月三萬五。每呎三十三個八，創紀錄。
其他日籍客，之前只係交二十四蚊。許志凌解釋，除咗呢個業主急於出租，另一個原因係單位尺碼較細。
另外，太古同區逸意居，呎租都係三十零蚊，所以，今次唔算好貴，況且重有啲海景㖭。
許志凌話，𠵱家有心租用逸樺園嘅查詢中，一半係日籍人士，其他有美國人、美籍及新加坡籍華僑。
逸樺園嘅市況，兩房單位叫價，月租兩萬到兩萬五；三房就要兩萬五到四萬，六七成係三萬蚊以上。

國金擦你鞋
商場大業主不斷為商場增值，新地中環國際金融中心商場，𠵱家重出到免費擦鞋招數，啱啱喺場內安咗三萬蚊擦鞋機，為啲行政人員清潔皮鞋，等佢哋對鞋時刻都可以「立立令」。
如此五星級服務係首創，唔知中區「擦鞋仔」，飯碗有冇打爛呢？
商場顧客服務部重提供傳真、影印及手提電話充電服務。另外又有餐廳訂座、借用輪椅同BB車、尋找失物與急救服務。逛商場，真係樂趣多。

賣樓即興
嘉華地產長沙灣嘉珀山，上個禮拜日突然開賣，即日重錄得高價成交。唔好以為發展商早有部署，原來真係非常突然。
嘉華陳玉成憶述，嗰日晏晝，原本同仔仔喺馬鞍山踢緊波，享受天倫樂。但地產代理以為個盤可以賣得，所以當日就帶埋成批準買家，去到現樓門外。
售樓處坐鎮嘅營業經理顏景鳳，了解過情況之後，決定接受買家預留，實行快打慢，而且重做到價量兼備。
蘭西
電郵地址：[email protected]