當年今日

股壇瀏覽器:兆晉消息陸續有來

蘋果日報 2002/05/30 00:00


兆晉國際(491)噚日停牌,宣布發行1600萬元新股及現金收購艾維通訊設備49%。黑客話今次只係開始,日後重有一連串行動跟住嚟,淨係睇管理層拒評和黃(013)入股一事就知道蘊藏玄機啦。此股今日復牌,有機會炒上0.20元水平。不過,阿虎見到此股噚日托高後,即有炒家出貨。
噚日唔少公司抽水,淨係冠捷(903)及上海置業(1207)就已經合共抽水6.47億元,炒開二三線股嘅游資好容易被抽乾。大市現正開始調整,玩二三線股小心為妙。

華脈變相賣殼
華脈無線通信(499)停牌,公布發行51%擴大後新股收購香港泰信,變相將控制性股權出售。據聞復牌後,股價會大幅炒上,短期目標為0.20元。
上海首富周正毅旗下盈榮集團(1104)與建聯通(067)噚日一度分別大升14%及9.6%,其中傳出周正毅快將國內地產項目注入盈榮。不過,兩股午後有壓力,升幅收窄。
華晨中國(1114)傳出資產將被國家收回,股價自然有壓力,噚日股價一度跌5.2%,但見里昂入市力撐,估計買盤係來自幕後人士。
Cookie話,聽講幕後人士頂得相當辛苦。華晨噚日同時宣布,市場期待已久嘅中華轎車合資計劃已經獲中國政府批准,唔知對股價有幾大支持?如果資產被國家收回傳聞屬實,震撼性一定大過合資計劃獲批准。
阿 虎