旺角店長單車熱

蘋果日報 2002/03/25 00:00


「店長熱」突然興起,揭開報紙雜誌街訪型人部分,十個後生八個職業都叫店長,店長做啲乜?係咪高級過Sales仔?點樣可以入行?一於去問下靚仔店長S。
靚仔店長S可以話係香港第一代店長,「做店長首要係鍾意扮型,天生有型就係成功店長嘅一半,後天就靠潮流產品搭夠。好似最近旺角區嘅大部分店長有部BMX傍身,返工放工都踩BMX,十足十日本原宿啲店長咁型!」做高官有架BMW,做店長就有架BMX,同作為身分象徵,店長S有理。
「去一去通菜街『旺單』會經常碰上店長行家,個個都嚟呢度砌車,二千零蚊已有架美國車,買對別注版波鞋都唔止喇!」聽聞除潮流店長外,連娛樂圈中人亦喺度砌車,E神、T鋒同埋彈結他好醒嘅P黃(朱茵男友)部七、八千蚊勁車就喺度砌。做店長潮流觸覺果然快人一步,加埋娛樂圈人追捧,又有《E.T.》電影效應,單車熱城愈來愈蔓延。

主持人:大食Jack
八卦熱報:[email protected]