感情篇：因為不愛所以不恨
前年六月，陳曉東首次公開拖着張栢芝亮相，公開承認戀情。去年六月，相戀年多的二人公開承認分手，但他們之間的新聞至今才餘波剛了，其間有傳二人復合、再分手、出現第三者，牽涉的人物有謝霆鋒、陳小春、黎明、鄭中基、王菲、楊千嬅、周麗淇及台灣女星葉安婷，陣容可謂十分龐大。
「謝霆鋒係我朋友」
記：見到張栢芝、謝霆鋒同陳小春，你會唔會打招呼或者合照？
東：打，點解唔打招呼？我噚日重買咗陳小春隻碟嚟聽，幾好㗎。合照只要喺自然嘅情況下發生就得，太刻意嘅話，我會話你知我唔需要用呢啲嘢嚟宣傳囉。
記：你有冇諗過人哋當唔當你係朋友？
東：好多嘢都只不過係一場誤會，有乜大不了？點解唔可以做朋友？謝霆鋒都係我朋友。全世界每個人都可以係朋友，都可以係老師，你可以從每件事、每個人身上學到好多嘢，不過人哋點睇，係人哋嘅事，一切講緣份。
記：謝霆鋒唔係你情敵咩？
東：我唔係任何人嘅情敵，不嬲都話唔關事，我哋自小相識，只係太耐冇聯絡，佢嘅感情問題同我無關，我分手亦唔關佢事，我同佢根本冇嘢，只係唔會特登攞對方嚟講。早排我都有去過佢屋企玩，真係冇嘢喎。
記：你對張栢芝同謝霆鋒會唔會有恨？
東：冇嘢好恨，有恨咪即係重愛囉，你要好執着一樣嘢先至可以好恨一樣嘢。
記：講就容易，做起嚟會唔會好難？
東：其實真係講就易，好難做到，要經歷一場心理戰爭，我只係唔想傷害人，唔好害人害己，唔好影響工作，要平衡好多嘢㗎。
盼望愛一生一世
記：你最近做十個訪問，十個訪問都係講張栢芝，你唔講佢有乜好講？
東：你估我想㗎？我明白之前所有報道都係講嗰啲是非，𠵱家事情過去咗，大家自不然想知雨過天青後我嘅心理狀況係點，我出得嚟做訪問，你問我乜我都盡可能答你，算係一種尊重，但你畀我揀，我當然想講音樂，咁係咪代表你就唔會問先？
記：日後會唔會抗拒揀圈內人做女朋友？
東：唔關事，係愛就愛，冇分上下左右前後，睇需要啫！Loveisamiracle（愛是奇迹）。我唔會太執着，但仍然希望可以一生一世，事實樣樣嘢都會變，不過我仍然相信有唔變嘅愛情，未必係男女之間，父母、朋友都可以有一生一世嘅感情。
親友總動員支持
記：你唔開心時，父母會點樣支持你？
東：我屋企係虐待家庭，我媽媽見我唔開心，佢就會講啲嘢嚟刺激我，好似用電擊電你，等你有番心跳嗰隻。佢為我擔心到喊，我咪安慰番佢囉，我話：「阿媽，我會撐住，你唔使驚。」我成日唔喺佢身邊，唔想佢為我咁擔心，更加唔想佢為我唔開心。
記：你爸爸呢？佢住上海，你住香港，你哋感情點？
東：我哋感情好好，我周不時返上海探佢。我爸爸係典型上海人，好有父親威嚴，對我要求好高，佢都問過我點解有咁多負面新聞，不過佢哋明白我，支持我，喺我最難過時令我好感動，動員晒啲親戚朋友嚟支持我，呢啲咪一生一世嘅感情囉。
後記：花四年學懂妥協
為東東拍照當日，筆者劈頭就對一身黑衣的東東說：「黑衫咁沉，換件白色啦。」東東「哦」了一聲馬上去換。然後，筆者再戰戰兢兢地問：「搽啲凡士林喺面度得唔得？」東東即答：「搽囉。」再之後，東東二話不說任筆者弄亂他那讓髮型師吹了半小時的整齊髮型。
四年前，只是叫他除掉太陽眼鏡拍照，他也會向你皺眉頭。
連東東自己都說：「冇嘢係唔會變㗎，人嘅樣都變啦。」他的確變了，學懂在適當的時候妥協，這不叫「奇迹」，這叫做「長大」。