踏進新一年，小初在此向大家恭祝新年進步，今年賺多啲。
小初保持一貫作風，繼續向大家推介細價股，今日同大家講吓今年首隻新登場，非常冷門嘅中國投資基金（612）。
中國投資整個上市過程低調到不得了，相信知道大股東係乜水嘅人都唔慌多，小初既然提起，當然有原因。
話說前年年頭，第一隻公開招股嘅上市公司，就係開明投資（768），當日嘅上市保薦人之一，亦係現時中國投資嘅保薦人，咁啱兩間公司都係投資公司。
開明𠵱家嘅股價表現，當然同其他投資公司一樣，都係非常靜。不過，小初記得開明上市初段，表現確實唔錯，主要因冇咩人認識，少人攞貨，形成貨源集中，所以上市後有表現。
今次原班人馬崔護重來，中國投資有望可以食過番尋味，博大霧短炒一轉，但讀者緊記風險極高，只宜短炒。