爆相爆片:炮彈飛車自炒 拋出司機 女伴

蘋果日報 2019/01/04 00:00

車禍天水圍廈村

前晚將近11點,周先生喺天水圍廈村行緊去天盛苑方向,途經天影路橋底嗰陣,聽到橋面傳嚟撞車聲,仲有把女聲嗌救命。佢走上橋面睇吓有乜嘢幫到手,見到有個女仔坐喺路邊,臉同手都有流血,周先生安慰佢話會幫手報警,個女仔就好緊張咁同佢講仲有一個人,原來佢所講嘅係司機。
empty
被拋出車嘅男司機攤喺路面,有熱心途人踎喺旁邊安慰。
冒煙兼有爆炸聲
當時其他駕駛者都有落車幫手,司機原來赤腳側身攤咗喺路面,有個女途人踎喺旁邊睇吓佢點,之後消防同警察到場救援同調查。初步得知,23歲姓陳司機揸豐田Camry私家車載住同年紀女伴,沿天影路落橋向流浮山行車,去到天盛苑對開一個彎位失控撞埋左邊石壆,反彈再撞右邊石壆,再衝前200米撞燈柱,打咗幾個觔斗之後四輪着地。

懷疑司機同女乘客都拋咗出車外,私家車冒煙仲傳出爆炸聲,右尾轆甩咗出嚟,電池、零件、玻璃碎跌到一地都係,架車撞到好似廢鐵咁,私家車咪錶顯示當時車速差唔多160公里。司機同女乘客個頭都受傷,分別送咗去兩間醫院治理,情況嚴重,警方調查緊意外原因。