發展商賣樓手法有變，以往一早公布開記者會日期，𠵱家就今日通知，明日就「嚟料」，有時真係搞到記者大失預算。有人估話因發展商唔想同行知道佢哋嘅部署，以免畀人「後發先至」，搶咗先機。假如真係咁，反映發展商之間嘅競爭愈嚟愈大。
九龍倉（004）今年有多個新盤開售，首個係青山灣翠濤居，稍後就有深井碧堤半島，發展商今日請傳媒一次過睇晒兩個盤，因兩者都有無敵海景，所以發展商特別安排座船響海面睇樓。

泓景臺送完車送手機
長沙灣泓景臺送完車就送名貴手機。長實執行董事趙國雄昨日主持送車頒獎禮時，一直手持一部7000幾蚊嘅MotorolaV70限量鑲鑽屏幕版最新款手電，起初佢周圍叫人同佢影相，搞到記者以為佢連同系公司Orange都想撈埋，原來係送畀泓景臺買家。
趙國雄昨日一反過去有問必答習慣，因為今日公司宣布業績，要暫時封口。不過都忍唔住講咗句，泓景臺會因應政府取消置業貸款而推出新招，今日公布細節。
蘭西