番禺窗簾布藝專門店
商場作後盾40萬搞掂
蘋果日報 2002/05/03 00:00
如果閣下對布料、窗簾設計的眼光和品味充滿信心，不妨考慮北上搞窗簾生意，所需的資金不多，四十多萬已經可以做老闆；若在商場租舖，更有他們做後盾，申請營業牌的手續便簡單得多，而最重要的反而是搵到一個好的縫製窗簾布師傅。
記者：曾順珍 攝影：林栢鈞
記者：曾順珍 攝影：林栢鈞
1.明燈引路：國內做生意，因為政策繁複，最好要有熟人幫手，指點迷津。
2.依正手續：不要相信用錢便可以領得各項牌照，一定要跟足步驟領牌，否則後果嚴重。
3.準時交貨：做窗簾行業，一定要找個好的窗簾師傅幫手，和準時交貨給客人。
4.不恥下問：不懂的地方不妨多問別人。
踏入位於番禺祈福新邨的家居樂窗簾布藝專門店，發現店內有五、六個職員正忙着縫製窗簾布，師傅還即席在地上剪裁布料，而車衣女工則把布料縫合，趕着準時交貨給客人。
孟大來是這間窗簾布藝公司的老闆娘，她在番禺住了6年，說是因為丈夫北上工作的關係；她自己亦嘗試北上創業。
「我以前開地產公司嘅，一做就做咗十幾年，發覺政府對地產公司嘅條例愈嚟愈嚴謹。去到96年，個樓市實在升得太勁，我感覺到成個市好快就會死，於是我開一個好『筍』嘅價錢將間公司頂咗畀人，自己就上嚟大陸搞生意。
「當時我丈夫喺香港做髮型師，佢亦覺得剪髮嘅價錢愈搶愈低，認為香港嘅理髮行業好難生存，於是就上嚟搞HairSalon。而我自己以前亦有學美容，所以咪幫丈夫一齊搞髮廊囉。」
早在91年，孟大來已在祈福買樓，只是六年前，才跟隨丈夫在此做生意和定居，直至半年前，孟大來才有搞窗簾生意的念頭。
「以前我都試過喺呢度搵唔到啱心水嘅窗簾布，直至我去過出面市區一間舖頭，佢賣嘅窗簾布好靚，於是我就幫襯佢哋。後來咁啱呢個商場有舖位，心諗呢度嘅樓不停咁起，為求方便，一定會有人客嚟屋苑商場買窗簾布，所以我就決定開一間布藝公司。」
孟大來話自己從未接觸過此行，對窗簾根本一竅不通，於是她便到自己幫襯過的那間店舖，邀請他們一起合作經營。
「點知當我去到時，個老闆話佢哋會結束營業，連佢自己都會轉行，不過好在佢肯介紹幾個師傅畀我識，其中一個重係做咗二十年，就係𠵱家喺地下剪緊布嗰位，係個好有經驗嘅師傅。」
雖然孟大來是門外漢一名，但她謂自己的好處是不恥下問，總之逢行家都詢問布料的來源、質料等問題。
「我有返香港行花園街嘅店舖做資料搜集，就算唔識嘅行家我都會走入去，問佢哋布料喺邊度嚟，又或者中國最大嘅布疋市場喺邊度呀咁，總會有人知。另外我又有個中國記者朋友，佢幫我問咗好多資料，於是我又知道應該去邊度買布，可能我以前做地產經紀啩，所以可以唔怕醜咁去問人，我覺得只要肯問人，唔怕碰釘，就可以做得成功。」
在「唔知就問」的原則下，孟大來的營業大計進行得頗順利，由租舖、租工場到入貨請人都在兩個月內大功告成，然後開張大吉。
現在的孟大來，已能像內行人般的口脗告訴人客要揀哪一類布料才適合做窗簾布。
「初時我都有撞過板㗎，入咗一啲質料唔好或者花款唔啱客人口味嘅布料，𠵱家全部都放喺倉入面。好在我嘅窗簾師傅經驗好，佢教曉我乜嘢叫靚布，加上我學嘢學得快，好快就上手。」孟大來蠻有自信地說。
為了要在同行中突圍而出，孟大來話自己入的貨都是精挑細選的，兼且屋邨的住客消費能力較高，她還會入高價的進口貨。
「住喺呢度嘅本地人素質較高，而香港人又好識貨，所以我嘅貨品會有一半係由意大利同土耳其入口，而其他就由浙江、杭州等地買入。此外，我都跟內地一位專做出口美國木簾嘅廠家相熟，好似呢類椴木做嘅木簾，就有防蟲、防蛀同唔會扭曲嘅功效，比楓木好得多，但只有美國同中國東北省先有得出產，聽講內地係唔准將椴木出口，所以連香港都無得賣。除咗呢啲高質素嘅窗簾外，我都會賣啲每米十幾蚊人民幣嘅布料，以切合唔同顧客嘅需要。」
家居樂的生意，有六成是來自假日期間，因為不少香港人都會北上遊玩，順道購買窗簾布。
「嚟我呢度幫襯嘅人，遊客同住客各佔一半，因為跟香港嘅價錢比較，我哋真係平好多，同一幅布料可能相差二、三十蚊；又例如木簾咁，我哋嘅用椴木，每平方米賣?380，香港用楓木大約也要港幣$500，重要客人最少做18呎。所以唔少客人都會上嚟買窗簾，有幾張單嘅數目都成七、八千蚊㗎。」
孟大來的店舖之所以有工人即席車縫和裁布，是因為港客大部份都是來去匆匆。「香港嘅客人多數會要求即日或第二日攞貨，為咗應付呢啲客人，所有舖內嘅布料，我都要有存貨，如果起貨起得唔夠快，又或者唔準時交貨，顧客就會幫襯第二間。重有我發現好多客人都唔會慢慢睇布料樣辦，佢哋通常只會望掛起嘅窗簾辦，見到啱就買，所以我又要不時做不同布料、顏色嘅窗簾辦掛起嚟。」
對於顧客的口味，孟大來認為港客同內地人的喜好相若。
「咪以為內地人品味『娘』，今時今日嘅大陸，已經唔係以前嘅大陸，住喺呢度嘅內地人，品味都有番咁上下，佢哋唔會鍾意大紅大紫或花碌碌嘅款式，而係愛揀清雅嘅布料。至於香港人，就比較鍾意素色啲，但又要淨色得嚟帶少許花紋，價錢大約每米?100左右。所以以前入嗰啲好花嘅布料，唔係咁受歡迎，惟有慢慢賣出去囉。」
開舖至今已有半年，孟大來說生意經營得頗順利，就算是開舖初期，亦從未有失控的情況出現。對每月的盈利，她亦頗為滿意。
「我呢度嘅生意，係靠口碑，靠客人一個介紹一個來幫襯，如果生意額能保持落去嘅話，我預計大約一年後就會回本……不過我諗𠵱家最想嘅，係教吓客人接受日月簾，價錢雖然貴啲，每平方米賣?600，但可以防塵、防靜電……」
由於窗簾布行業只是普通種類行業，加上又有商場做後盾，所以領牌的手續很簡單，申請人只需帶齊以下證件，便可到當地工商局申請營業執照。
1.個人身份證
2.內地合夥人身份證
3.戶口簿
4.註冊資本
5.租約
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。