【韓流】月底由情侶變夫婦 雙宋幸福囍帖曝光

蘋果日報 2017/10/14 11:00

宋慧喬宋仲基

韓國神劇《太陽的後裔》嘅宋仲基同宋慧喬今年7月認戀兼宣佈將於本月31號結婚,呢個喜訊令雙宋粉絲都大感驚喜。
而呢兩個月來,不時都見到雙宋愛嘅足跡,當中兩人先後到美國影婚照,早上又飛咗去巴黎預支蜜月,就連返到韓國之後,都被目睹食早餐撐枱腳,又結伴去捧好友玉珠鉉嘅音樂劇,真係好甜蜜。
雖然今次婚禮雙宋就謝絕贊助,所有嘢都親力親為去籌備,而噚日更有疑似雙宋嘅囍帖曝光,根據雙宋粉絲表示呢張囍帖上寫咗雙宋嘅父母名,之後就寫咗家中排第二,即父母第二個兒子嘅宋仲基個名,然後就寫咗喬妹母親名字同埋唯一嘅女兒喬妹個名。張囍帖好簡潔,白色信封再配以白色絲帶,信封上有一小束草用來點綴,符合雙宋低調嘅性格。
另外,今日韓國傳媒報道,宋仲基近日捐出13.8萬港元嘅善款予兒童癌症患者,事實上宋仲基一向樂於做善事,早於服兵役時已捐出69萬港元予聯合國兒童基金會,退伍後又將舉辦見面會嘅收入捐出來做善事,同喬妹一樣善心爆棚。