當年今日

包拍制度! - 麥兆輝(導演)

蘋果日報 2005/07/17 00:00


拍電影有很多不同的方法,不過籌集資金的方法只有一兩種。最簡單直接的方法當然係搵電影公司老闆投資,不過就算你有好好嘅故事,有好好嘅劇本可能都冇用,因為拍電影本質上有太多不可預計的不穩定因素。冇人可保證回報的正確數字,所以唯有控制投資。有啲老闆為咗減低損失就用咗一個好簡單嘅方法叫做「包拍制」。就係製作單位畀個拍攝預算投資單位,雙方經過討價還價,訂下一個數目,然後製作單位就簽下一個包拍合約,保證在預算的金額內完成電影。基本上十分公平,不過拍電影同造一架車不同,有啲嘢可以好冇準則。

計算一部電影的拍攝預算方法其實可以好簡單,首先要有一個劇本,根據劇本上的內容已經可以換成大量的數字,包括拍攝日數,器材上的要求,有冇特技動作,要唔要大爆炸,撞爛幾多架車,使唔使死人冧樓。再加上演員、導演、監製以及其他工作人員的薪酬,已經有足夠資料可以推算出一個基本預算。
但係拍電影嘅變化可以好大,就用服裝做個例子,如果手鬆啲嘅可以去Joyce買衫,手緊嘅就廟街都冇問題,真係想慳嘅就喺屋企攞兩件出嚟都重得。選景亦都係一樣,同一場食飯戲可以由高級餐廳到茶餐廳到坐喺公園拿個飯盒都拍得,肯改劇本同唔堅持就得。
所以包拍最大問題就係制度上充滿誘惑,如果一部戲包咗一千萬拍,咁梗係死慳爛慳八百萬搞掂,咁就賺多二百萬。當然好少有人咁離譜,因為「包拍制」通常都係偏向低於正常預算,有時重係低好多。有心嘅導演為求開戲亦都迫於接受,但係真係會影響電影的質素。