再有韓國男星涉性騷擾醜聞，曾出演韓劇《任意依戀》、《醫療船》嘅21歲男星李瑞元今日被爆性騷擾同行女藝人。

根據韓國《東亞日報》獨家報道，主持電台節目嘅21歲男演員涉嫌使用兇器對同行女藝人進行威脅，目前正在接受警方調查。而首爾廣津區警局已於上月8號對A某進行立案調查兼提出訴訟。警方透露A某同女藝人一齊飲酒時對女方進行親吻等身體接觸，但遭到拒絕，但A某冇停止，女方此時即打電話畀男友尋求協助，A某更使用兇器威脅B某。

警方表示A某喺醉酒嘅情況下接受調查，仲在現場對差人辱罵。隨後媒體公開A某正係李瑞元，而李瑞元方面回應：「對於李瑞元造成的不便，我們深表歉意，也沒有任何理由及藉口，向你們所有人道歉。」

而現時李瑞元有份拍攝下周一首播、由李聖經、李尚允主演嘅tvN新劇《想暫停的瞬間：About Time》，估計佢今次捲入性醜聞，有機會對劇集延遲播出。

更多韓流，喺晒《娛果》
http://fb.com/appledailyent