波鞋，已經唔單止着去打波同出街咁簡單，除了演變成潮流文化，更是唔少人的「愛藏品」，話唔定未來有間波鞋博物館㖭；香港籃球隊後衞胡國鋒就係其中一個波鞋癡，屋企收藏接近五十對波鞋，加上成日打波，對波鞋特性同功能都瞭如指掌，堪稱波鞋專家。　圖：黃冠華　文：盧漢傑

同大部份青少年一樣，胡國鋒「首次自置」波鞋都係由「死慳死抵」開始，阿鋒說：「記得當年讀緊中四，初初跟同學打籃球，足足儲了二個月零用錢，機舖都唔去，有時更加唔食早餐，先至儲夠錢買鞋；最後經同學介紹，用六百幾蚊買了NikeAirJordan白色六代，重足足着了兩年，鞋底穿窿先至捨得扔。」

擁過百對籃球鞋
在阿鋒多年籃球員生涯，至今擁有過百對籃球鞋，亦收藏了其中五十對，芸芸收藏品中，最珍惜就是兩對NikeZoomFlight95，他說：「這兩對鞋已經『跟』了我大約七八年了，我參加的多個大賽，好似亞洲盃、亞洲冠軍球會盃都是着它們，現在就算着舊了都不捨得扔，用鞋盒好好收藏。」
而阿鋒最瘋狂的收藏系列，就是AirJordan11，足足儲了七對，包括高峯期炒價高達五千元的原版白X黑、香港十分罕見的白X白等，阿鋒滿足地說：「11代可說是最經典、最『潮』的波鞋，當年率先用漆皮作材料，不論打波、去街，甚至襯西裝都得。」