八方日前寫過，民主黨黃偉賢失蹤，又退出唔選立法會，唔知係為錢銀定係為女人，結果搞到Z周身蟻。Z噚日有參加紀念六四遊行，佢同八方講，佢女友睇完就向佢「興師問罪」，阿媽喺街市買餸，阿媽啲朋友就好關心佢，甚至問佢阿媽：「Z係咪失咗蹤？」八方其實好相信，Z份人唔會因錢銀同女人出事，八方尋人只係出於關心，今鋪一時玩大咗，真係要同佢阿媽、佢女友Say個Sorry。
Z話，佢一直冇意參選，只不過副主席李永達話佢民調幾好，更試過每隔兩個鐘就游說佢一次，甚至叫埋前副主席張炳良一齊游說佢，結果佢耳仔軟就答應咗，其實佢真係無乜意願做立法會，反而對地區工作更有興趣，為咗逃避達哥迫佢做決定，迫於無奈只好玩失蹤。
好彩Z今次只係退選立法會，達哥都唔會點介意。但做人好多時候無taketwo，如果Z第日再次因耳仔軟做錯決定，到時想好似𠵱家咁轉軚都好難啦！


傳真︰2623-9278
電郵︰[email protected]