飲食Ｎ之老友飲食Ａ去會展睇展覽，一落的士（舊翼正門），就見到三張告示貼在玻璃大門：（一）不准攝影；（二）不准攜帶飲食入場；（三）不准吸煙。玻璃大門外，一群中國同胞企喺度吸煙，飲食Ａ已經見慣，不以為奇。入到會展大堂，行咗幾十步，兩個大垃圾桶旁邊，一班國內同胞、歐美白人黑人企在大垃圾桶旁吸煙；咦，咪話不准吸煙嘅，乜冇人理，護衞員去咗邊呀？重唔趕客，唔准佢哋吸煙？
入到會場，行過去中國館，重奇，每一個中國企業攤位（booth），逢有枱櫈在內嘅，枱上都有煙灰盅，當然唔係要嚟做裝飾嘅，而係有實際用途，中國人好客，有客上門，一定茶煙奉客，先請飲茶，後請食煙，此習慣幾十年不變。

飲食Ａ好懷疑會展管理公司、貿發局究竟有冇認真執行「不准吸煙」，如果有做嘅話，會唔會得罪大陸同胞。將來實施全面禁煙條例後，TDC夠唔夠膽趕中國參展商，一定唔准佢哋在展覽館內食煙。TDC執行嘅話，要請多二、三十個護衞員巡視展覽場地都似。
若然有咗新條例，酒店房間（現分吸煙與非吸煙樓層）准唔准吸煙呢？譬如印尼、大陸遊客住在准許吸煙房間，吸煙是否違法？據飲食Ａ所知，特區政府見錢開眼，唔敢得罪遊客，會畀酒店轄免。但如此一來，唔公平咯喎，點解遊客得，酒店得，食肆、珠寶公司唔得？此外，一般高尚會所內專為高級人士而設嘅「雪茄房」，都係要拆除。
總之新例一生效，適應需時，預料會引發好多爭拗，警察會好唔得閒，全體市民得到乜嘢效益呢？冇人講得清楚，最清楚嘅就係政府唔捨得啲煙稅，否則當香煙係鴉片毒品，全面禁制，不准入口，各行各業都冇爭議！