法國五月2015活動今日喺中環PMQ元創坊廣場搞開幕，邀請林嘉欣做揭幕嘉賓，已為兩女之母嘅嘉欣身穿鬆身裙現身，起初被誤會再度有喜，佢即解釋：「唔係呀!我決定收工喇!大女5歲，細女2歲，丈夫家族已有男孫，我可以撇除壓力，最重要係我好想做返嘢。」

嘉欣就接拍由丈夫袁劍偉執導，與張學友合作拍攝電影《暗色天堂》（暫名），嘉欣話：「同學友14年冇合作，《男人四十》到0依家，14年前做師生戀，14年後做同事，咁多年佢好似瞓雪櫃咁幾好，而佢就話我大個咗。」

嘉欣雖然同老公合作，但佢哋都會分配好時間照顧家庭，被問夫妻合作會唔會易起磨擦爭執，嘉欣表示：「冇啦，不嬲片場係導演大哂，埋咗位就唔係老婆。」嘉欣透露今次以優惠價片酬同老公合作，更笑言：「我好多功能，可以幫手影劇照，又可以幫手碌人情咭。」