近排部分8字頭嘅創業板股又有得炒，好似數通集團（8030）就係一個例子。
數通舊年年底公布，以溢價贖回一批舊年3月發行嘅可換股票據，以每股36仙發行新股支付。小初當時重以為對公司股價有啲啟示，點知到今年2月底，股價竟然插到最低7.6仙，真係膽小啲都嚇死，好彩小初都頂得順。
或者真係守得雲開見月明，數通終於由谷底回升，早排重炒到上20仙。據經紀黃講，由於有班大陸佬落場炒作所致。查實今時今日，除咗大陸佬之外，恐怕都冇太多人有錢咁玩法。
不過，或者因為被證監盯得緊，數通早幾日就靜咗一陣，噚日又見有鑊氣，最高見過18.6仙，收17.6仙，升9.3％。經紀黃話，人哋重未玩完，稍後股價唔排除繼續有波動。
不過，數通將於3月26日公布全年業績，但早排公布過9個月嘅業績重蝕緊錢，斷估今次都唔慌有驚喜，只宜短炒。