巴西對德國爭世界盃，大家都知邊隊贏，巴西贏波唔奇，奇就奇在德國射唔入一球，哥斯達尼加、土耳其、英格蘭都曾攻破巴西大門，點解德國做唔到呢？事先個個（除咗德國人）都擁巴西，英國足球專家文章大字標題就係：讓森巴太陽照耀星球（見《南華早報》六月三十日）。點解咁一面倒呢？有其文化原因。
作家馬國明喺《信報》（六月二十九日）有一篇絕好文章：〈足球．虛擬的浪漫〉，可能係今屆世界盃大量文章之中，最好嘅一篇中文作文，我哋之鍾意足球，之唔要電視重播（如美式足球）嚟推翻球證嘅錯誤判斷，就因為大家心中有一份平時不能宣洩、唔知點宣洩嘅浪漫情懷。浪漫係唔可以預測，唔可以用電腦程式計算，唔應該俾科技操縱，須發自真性情，源於自我內心，產生於剎那間嘅放縱。巴西足球講求進攻、開放、球員創意，係足球藝術家。德國人以工程聞名，注重orderanddiscipline（秩序與規律），精於一板一眼，踢足球好似預先用電腦計算過，所以每每能以弱勝強。藝術家有瘋癲行為，不顧後果，好似中堅盧斯奧有幾次好似打中鋒，由自己後防帶波直衝德國心臟，暴露後防空間。喺第二個國家，呢啲球員肯定俾教練鬧死！
巴西之為巴西，就因為李華度與朗拿度嘅天才，喺十零分鐘之內，如火山爆發令機械人束手就擒，藝術家打贏機械人，令我哋對人生充滿浪漫憧憬，希望四年後森巴舞征服柏林。